मानण्यात सुख

होतो हर्ष स्वप्नात पाहताना

जागेपणी नुसतास भास

समीरासम चोहीकडे रूप ठायी ठायी

अनुभवायचेच सारे, शब्दही न ओठी

स्पर्श नुसता कल्पिलेला

समाधान दुरून पाहून

जसा खिडकीतून पाऊस पहावा

अन् पावसात न भिजताही 

तन-मनात ओलावा हवा

असेच हे चालणार असेल तर

सवय करायलाच हवी

मानण्यात सुख हे मनाला

समजवायला हवे

दूरवर जाणा-या नावेस पाहून

हात हलवायलाच हवा

जेणेकरून नावेतल्या माणसाला

माझा कायमचा निरोप हा कळायला हवा…