फसवा बहर

मोगरा फुलला, अंगणी गंध दरवळला

सख्याच्या ओढीने, जीव व्याकुळला

परसात लाविली फुलझाडे, परि मोगराच आवडे

नाजुकशी वेल तयाची, श्वेत सुगंधी बहर चढे

सुवासिक कळी मोग-याची, प्रिती उमले मनातली

प्रियाची मज आठवण येता, हसली कळी गालातली

मोग-याची फुले वेचली, अन् हार गुंफिले

सख्या तुझे स्वागत करण्या सज्ज जाहले

ओंजळ भरली फुलांनी, दरवळ वाढतच गेला

कळ्यांनी तुझ्या येण्याचा निरोप मला सांगितला

हा सुगंधी मोगरा वसंत ऋतूत बहरतो

तुझ्या येण्याची चाहूल देतो

आजही मोगरा फुलला आहे

नखशिखांत वेल बहरला आहे

पण फुलांचे फुलणे हे केव्हातरी कोमेजणे

तसे त्याच्या येण्याचे

आणि माझ्या स्वप्नांचेही…