तू इथेच कुठेतरी आसपास

प्राचीचा रंगसोहळा

किलबिल गीत सुमधूर

तुळशीपुढे दरवळला धूप

या क्षणी येतेय तुझी आठवण

हा दिवस आहे खूप खास

तू इथेच कुठेतरी आसपास

निलवर्णी नभाची शाल

भुईवरल्या हिरवळीला

रविकराची आस

तू इथेच कुठेतरी आसपास

हळूवार वा-याचा स्पर्श

मधूनच सुरंगीचा सुवास

तू इथेच कुठेतरी आसपास

रात्रीचा हिरमुसला मोगरा

दिव्याची मंद ज्योत

निद्रिस्त पलंगावर

तुझ्या स्वप्नांची रास

तू इथेच कुठेतरी आसपास

दिवस उगवतो कसाबसा सरतो

तुझ्या अस्तित्त्वाची जाणीव

क्षणोक्षणी होते

नाही…मनच तशी कल्पना करते

तू इथेच कुठेतरी आसपास…