ती म्हणाली...

ती म्हणाली,

हल्ली व्यक्त होण्यासाठी, 

सोशल मीडियाचा आधार घेते...
फेसबुक, व्टिटर, व्हाट्स अप, युट्यूब, लिंक्ड इन गुगल प्लस, ब्लॉग
सारी माध्यमं छानच आहेत,
मला मनसोक्त मन मोकळं करता येतं…
कसलीच बंधनं नसतात…
असं म्हणतात की,
सोशल मीडिया आपल्या हातात असलेलं कोलीत आहे.
त्याने जाळपोळ करायची की त्या कोलीताने शेकोटी पेटवून,
स्वतःसाठी उबदार वातावरण तयार करायचं?
हे आपल्या हातात आहे…

कधी कधी वाटतं लॅपटॉपला सोडून,
चार शब्द पेनाने लिहावेत कागदावर…
लॅपटॉपवर टाईप करताना, तोही थकतो आणि मीही
मग वाटतं कागदाला जसं माझं मन कळतं,
तसं यालाही कळत असेल का?

आता मी एकटी नसते...
माझ्याभोवती हे सोशल मीडियाचं
व्हर्च्युअल जग असतं...
मेंदूत त्याचा ‘डेटा’ खच्चून भरलेला असतो...
हा ‘डेटा’ जाणिवपूर्वक स्टोअर करावा लागत नाही,
तुमच्या मेंदूचा तो नकळत ताबा घेतो.
तुमच्यापुढे पर्याय नसतो.
तुम्ही स्वतःला मार्केट करत राहता…
आणि ‘सोशल इमेज’ जपण्यासाठी धडपडत राहता...